2 Timotius 2:8-15

Bahan Pendadaran

Firman : 2 Timotius 2:8-15

Ing buku Bausastra tembung sangsara tegesipun urip cilaka. Kasangsaran (urip cilaka) saged arupi jasmani, mental, lan karohanen. Tuwuhing kasangsaran jalaranipun saged mawerni-werni, kadosdene amargi peprangan, raos sengit, bencana alam, kacilakan, penyakit, tetembungan ingkang ala lan nyulayani, brayat ingkang tansah cecongkrahan, lsp. Sambet kaliyan karohanen, kasangsaran tinampi awit ngugemi lan nindakaken piwulanging kitab suci, saged amargi tiyang sanes mboten remen lan saged amargi panerak kita dhateng pepaken ingkang kawulangaken. Kadosdene ingkang kelampahan tumrap Gusti Yesus lan para sekabatipun awit martosaken piwulang sejati, inggih piwulang ingkang sesambetan kaliyan pakaryan kawilujengan lan gesang langgeng lajeng nampi kasangsaran awit dipuntampik dening jagad.

Kenging punapa Gusti Yesus dipuntampik dening jagad semanten ugi kaliyan sekabat lan umat kagunganipun? Jagad ingkang kita panggeni punika sampun risak, risak saking panguwaosing dosa, angel nampi kayekten jati, umumipun kathah piwucal-piwucal ingkang nasaraken. Gusti Yesus, para sekabat lan umat kagungan jejibahan ingkang sami inggih punika martosaken kabingahan, kawilujengan lan kayekten jati. Kayekten jati ingkang sampun kababaraken dening Kristus Yesus nalika panjenenganipun rawuh ing jagad punika. Dadosa lumantar piwulangipun, welas asihipun, tuladhanipun lan pangurbananipun ing kajeng salib. Lumantar Gusti Yesus ugi, manungsa ingkang tebih kaliyan Gusti Allah sampun kapulihaken lan nampi gesang langgeng.

Mila menawi Rasul Paulus nampi ganjaran kinunjara amargi martosaken pakaryanipun Gusti Yesus, ngraosaken kasangsaran awit pawartosing Injil punika ugi sampun saklimrahipun. Amargi Gusti Yesus kemawon dipuntampik. Namung kadosdene paseksinipun “Iya marga saka pangundhanging Injil iku aku banjur nandhang sangsara, malah nganti dibanda kayadene durjana, nanging pangandikaning Allah ora bisa kabanda.” (ayat 9) lan ayat 10 “Mulane  aku nglakoni iku kabeh kalawan sabar kanggo para pepilihane Gusti Allah……”

Pangandikanipun Gusti badhe tansah kebabar ing kawontenan punapa kemawon. Semanten ugi lumantar kasangsaran punika malah dados pasinaonipun Rasul Paulus temah kasagedaken langkung sabar nyanggi kasangsaran ingkang tinampi. Rasul Paulus pitados bilih lumantar iman dhumateng Gusti Yesus lan purun nindakaken timbalanipun, boten badhe nglaha ananging nampi makuthaning gesang langgeng. “Manawa kita ndherek Panjenengane seda, iya ndherek Panjenengane gesang. Manawa kita nahanake iya bakal ndherek Panjenengane ngereh………….”  Kanthi tembung ringkes sedaya ingkang katindakaken sampun kacawisan gesang langgeng. Kadosdene ingkang nate kaparasetyakaken dening Gusti Yesus piyambak ing Injil Yokanan 16:33 “AnggonKu mulangake iku mau kabeh marang kowe iku, supaya kowe padha oleha tentrem rahayu ana ing Aku. Ana ing donya kowe padha nandhang panganiaya, nanging pada diteteg atimu, Aku wus ngalahake donya.”  Guti Yesus sampun maringaken pangajeng-ajeng tumrap sedaya tiyang pitados ing salebeting nampi kasangsaran awit Injil. Gusti Yesus piyambak ingkang paring pangandika bilih Panjenenganipun ingkang sampun ngawonaken jagad. Dados kenging punapa kita perlu ajrih menawi kasangsaran awit iman pitados kita, kaiidinan dening Gusti Allah?

Lumantar  punika mila Rasul Paulus ngatag dhateng Timotius supados tansah purun nindakaken ingkang kaping sepisan, piwulanging kayekten Jati “…….elingna lan pituturana ing bab iku kabeh kalawan temenen ing ngarsaning Gusti Allah, supaya aja padha mbulat mbulet rembuge……..”. Ingkang kaping kalihipun “udinen, supaya kowe pantes ana ing ngarsaning Gusti Allah anggonmu dadi juru leladi kang ora usah isin….”  Mekaten ugi bab paring pitutur lan piwulang, Rasul Paulus ngengetaken supados Timotius saged nedahaken gesangipun kebak ing patuladan iman lan mulang ing alandhesan pangandikanipun Gusti. Senajan ingkang katindakaken mangkenipun badhe kosokwangsul kaliyan tumindaking jagad, ananging bab gesang ingkang alandhesan murnining iman dhateng Gusti ingkang badhe njalari babaring sihipun Gusti tumrap sedayanipun.

Kalih perkawis ingkang kadhawuhaken dening Rasul Paulus punika temtu awrat lan nuwuhaken kasangsaran ing gesangipun Timotius. Ananging kasangsaran ing jagad punika mboten wonten imbanganipun menawi kabandingaken kaliyan kasangsaran ingkang badhe tinampi ing pejah langgeng. Gusti Yesus sampun mbabarken katresnanipun dhateng kita sedaya, mila sumangga piwulangipun Rasul Paulus punika nglandhesi kita sedaya ing salebeting cecawis nampi Sakramen Bujono. Amin.